प्रभुरामचंद्र विद्यालय, दादेगावच्या विद्यार्थिनींची कबड्डी स्पर्धेत उल्लेखनीय कामगिरी; आष्टी तालुका क्रीडा स्पर्धेत ठरल्या उपविजेत्या!

आष्टी (क्रीडा विशेष):

आष्टी तालुका क्रीडा स्पर्धेत शालेय क्रीडा विभागांतर्गत आयोजित कबड्डी सामन्यांमध्ये प्रभुरामचंद्र विद्यालय, दादेगावच्या १७ वर्षाखालील वयोगटातील विद्यार्थिनींनी जिद्द, चिकाटी आणि उत्कृष्ट खेळाचे प्रदर्शन करत उपविजेत्या पदकाचा मान मिळवला आहे.

कुस्तीपटूंची खाण आणि मातीतील अस्सल मल्ल घडवणारे माहेरघर म्हणून ओळखल्या जाणाऱ्या 'प्रभुरामचंद्र विद्यालय, दादेगाव' या शाळेच्या खेळाडूंनी कुस्तीप्रमाणेच इतर खेळांमध्येही आपली चमक दाखवून पुन्हा एकदा तालुक्यात शाळेचे नाव उंचावले आहे. अत्यंत अटीतटीच्या व चुरशीच्या झालेल्या या कबड्डी स्पर्धेत विद्यार्थिनींनी सांघिक खेळाचे उत्तम कौशल्य सादर करत अंतिम फेरीत धडक मारली पिंपळेश्वर विद्यालय पिंपळा विरुद्ध झालेल्या या सामन्यात विद्यार्थिनींनी उपविजेतेपद पटकावले.

ग्रामीण भागातील विद्यार्थिनींनी प्रतिकूल परिस्थितीत मिळवलेल्या या घवघवीत यशामुळे संपूर्ण दादेगाव व आष्टी परिसरात आनंदाचे वातावरण पसरले आहे. खेळासोबतच जिद्द आणि कष्टाची जोड असेल तर ग्रामीण भागातील तरुणही कसे शिखरावर पोहोचू शकतात, याचे उत्तम उदाहरण या विद्यार्थिनींनी आपल्या या यशातून दिले आहे.

या दैदिप्यमान यशाबद्दल प्रभुरामचंद्र विद्यालय, दादेगावचे मुख्याध्यापक, क्रीडा मार्गदर्शक, शिक्षकवृंद, पालक, ग्रामस्थ तसेच परिसरातील क्रीडाप्रेमींकडून यशस्वी विद्यार्थिनींवर व क्रीडा मार्गदर्शकांवर अभिनंदनाचा आणि कौतुकाचा वर्षाव होत आहे.