इंजिनिअर सुरज वाघुले यांचा धोंडे कॉलेजमध्ये सत्कार

ग्रामीण भागातून भरारी; सिस्को कंपनीत ४८ लाखांचे वार्षिक पॅकेज

कडा (विशेष वृत्त)

ग्रामीण भागातील विद्यार्थ्यांनी जिद्द, मेहनत आणि गुणवत्तेच्या जोरावर यशाची उत्तुंग शिखरे गाठता येतात, हे आनंदराव धोंडे ज्युनिअर कॉलेजचे माजी विद्यार्थी इंजिनिअर सुरज भगवान वाघुले यांनी सिद्ध केले आहे. बेंगळुरू येथील सिस्को कंपनीमध्ये साइट रिलायबिलिटी इंजिनिअर म्हणून कार्यरत असलेल्या सुरज वाघुले यांना ४८ लाख रुपयांचे वार्षिक पॅकेज मिळाल्याबद्दल आनंदराव धोंडे ऊर्फ बाबाजी महाविद्यालय, कडा येथे त्यांचा सत्कार करण्यात आला.

सुरज वाघुले हे आनंदराव धोंडे ज्युनिअर कॉलेजचे शैक्षणिक वर्ष २०१३-१४ मधील विद्यार्थी आहेत. त्यांनी बारावी विज्ञान शाखेची परीक्षा चांगल्या गुणांनी उत्तीर्ण केली. त्यानंतर छत्रपती संभाजीनगर येथील एमजीएमच्या जेएनईसी अभियांत्रिकी महाविद्यालयातून त्यांनी अभियांत्रिकीचे शिक्षण पूर्ण केले. आपल्या गुणवत्तेच्या, मेहनतीच्या आणि चिकाटीच्या बळावर त्यांनी नामांकित सिस्को कंपनीत महत्त्वपूर्ण पदावर काम करण्याची संधी मिळवली आहे. त्यांना मिळालेले ४८ लाख रुपयांचे वार्षिक पॅकेज हे ग्रामीण भागातील विद्यार्थ्यांसाठी प्रेरणादायी ठरत आहे.

या यशाबद्दल महाविद्यालयाच्या वतीने प्राचार्य डॉ. हरिदास विधाते यांच्या हस्ते इंजिनिअर सुरज वाघुले यांचा सत्कार करण्यात आला. यावेळी उपप्राचार्य डॉ. बापू खैरे, डॉ. पंडित औटे, उपप्राचार्य आबासाहेब गाडे, डॉ. दत्तात्रय जिरेकर, सुरज यांचे वडील भगवान वाघुले, डॉ. खंडागळे, प्रा. डॉ. जी. पी. बोडखे, डॉ. अशोक माळशिखरे, प्रा. हातवटे, प्रा. हवालदार, प्रा. गांगवणे आणि प्रा. विजय बोडखे यांची उपस्थिती होती.

ग्रामीण भागातील विद्यार्थ्यांनी मोठी स्वप्ने पाहून सातत्यपूर्ण प्रयत्न केल्यास जागतिक स्तरावरील नामांकित कंपन्यांमध्ये यशस्वी कारकीर्द घडवता येते, याचे सुरज वाघुले हे उत्तम उदाहरण असल्याचे यावेळी उपस्थितांनी नमूद केले. महाविद्यालयातील सर्व प्राध्यापक व कर्मचारी यांच्या वतीने सुरज यांचे अभिनंदन करण्यात आले आणि त्यांच्या पुढील यशस्वी वाटचालीस शुभेच्छा देण्यात आल्या.